थेऊर (हवेलीनामा वृतसमूह) हवेली तालुका पंचायत समितीचे नवनिर्वाचित सदस्य युवराज हिरामण काकडे यांनी निवडून आल्यावर आपल्या समाजाभिमुख उपक्रमाला आग्रक्रम देत ज्येष्ठ नागरिक ओळखपत्रांचे (Senior Citizen Card) वाटप करून आपल्या पंचायत समिती सदस्य कामाची सुरुवात केली. थेऊर येथे आयोजित कार्यक्रमात ज्येष्ठ नागरिकांना सन्मानपूर्वक कार्डांचे वितरण करण्यात आले. शासनाच्या विविध योजनांचा लाभ घेण्यासाठी आवश्यक असलेले हे ओळखपत्र मिळाल्याने ज्येष्ठ नागरिकांना मोठा दिलासा मिळाला आहे. या उपक्रमामुळे नागरिकांमध्ये समाधानाचे वातावरण निर्माण झाले आहे.
यावेळी बोलताना युवराज काकडे यांनी सांगितले की, “ज्येष्ठ नागरिक हे समाजाचे आधारस्तंभ आहेत. त्यांच्या समस्या सोडविणे आणि त्यांना शासनाच्या योजनांचा लाभ मिळवून देणे ही आपली प्राथमिक जबाबदारी आहे.” पुढील काळात आरोग्य शिबिरे, प्रलंबित पेन्शन प्रकरणे तसेच ग्रामविकासाशी संबंधित प्रश्न सोडविण्यासाठी सातत्याने प्रयत्न करण्यात येणार असल्याचे त्यांनी स्पष्ट केले. या कार्यक्रमास जेष्ठ नागरिक उपस्थित होते. ज्येष्ठ नागरिकांनीही या उपक्रमाचे स्वागत करत नव्या प्रतिनिधींचे अभिनंदन केले.
आरोग्यदूत युवराज काकडे यांनी एक महिन्यापूर्वी आळंदी, कुंजीरवाडी, थेऊर, कोलवडी, मांजरी, आव्हाळवाडी या गावांत शिबिर आयोजन केले होते त्यामध्ये ५०० पेक्षा जास्त ज्येष्ठ नागरिकांनी सहभाग नोंदवला होता. थेऊर व कुंजीरवाडी या गावांचे कार्ड वाटप पूर्ण झाले आहे. कोलवडी, मांजरी व आव्हाळवाडी या गावांचे कार्ड वाटप, जिल्हा परिषद सदस्य कोमल संदेश आव्हाळे व पंचायत समिती सदस्य सुषमा मुरकुटे यांच्या मार्गदर्शनाखाली लवकरच होणार असल्याचे आरोग्यदूत युवराज काकडे यांनी सांगितले.